Miss South Africa 2024: Nigerians react as South Africa crown Mia Le Roux few days afta Chidinma Adetshina withdrawal - BBC News Pidgin (2024)

11 August 2024

Nigerians don begin react afta South Africa crown Mia Le Roux as di winner of di 2024 Miss South Africa Beauty Pageant.

Dem crown di Free State-born model for one ogbonge ceremony for di Sun Bet Arena for Time Square, Menlyn, Pretoria on Saturday.

Di 28-year-old wey be model, marketing manager and student beat nine oda contestants to emerge as di winner.

Mia le Roux na di first deaf woman to dey crowned Miss South Africa.

She dey crowned winner of di 2024 Miss South Africa Beauty Pageant afta one divisive competition wey see one finalist withdraw afta she dey trolled sake of her Nigerian heritage.

For her acceptance speech, Ms Le Roux say she hope say her victory go help those who wey feel excluded from society to achieve dia "wildest dreams, just like I am".

She say she wan help those who wey dey "financially excluded or differently abled".

Last week 23-year-old law student Chidimma Adetshina bin pull out of di competition afta allegations say maybe her mama tiff di identity of one South African woman.

Ms Adetshina bin withdraw afta one report from South Africa Home Office wey say indications dey say her mama commit fraud and identity theft in registering her wen dem born am.

However for one media interviews, she explain say her father be Nigerian and her mother na South African of Mozambican descent.

Ms Adetshina - 23-year-old law student - say dem born her for Soweto, one twon wey dey next to Johannesburg, and she grow up for Cape Town.

For several weeks her roots dominate centre of discussion for social media storm, as many pipo, wey include one cabinet minister, question her right to represent di kontri.

She bin tok say she be victim of "black-on-black hate", wey highlight one particular strain of xenophobia for South Africa wey dey known as "afrophobia", wey dey target pipo from oda African countries.

Who be Mia Le Roux - di new Miss South Africa

Mia Le Roux na 28-year-old from Western Cape province.

Dem born her for Sasolburg, Free state and she grow up for Oudtshoorn for western cape.

Di new Miss South Africa na marketing manager, model and part time B Com Marketing student.

Wen she dey one-year-old, dem diagnose her wit serious hearing loss, wey mean say she no dey too hear.

She say e take her two years of speech therapy before she fit say her first words.

She add say her community rally behind her and dem give her di gift of hearing; Dis inspire her desire to make positive impact and break barriers.

She describe herself as pesin wey dey resilient, dedicated, graceful and kind.

Afta winning, di model and marketing manager say: "I be proudly South African deaf woman and I know wetin e feel like to dey excluded.

"I know now say dem put me on dis planet to break boundaries and I do am tonight."

How pipo react to her winning

Plenty reactions don follow di emergence of Mia Le Roux as di new Miss South Africa for social media.

As some hail and congratulate her, odas express dia dissatisfaction to wetin dem call hate for blacks for South Africa.

Part of dos wey react na Grammy Award winner and ogbonge singer Burna Boy, he post for im X account say "So afta all" and e put laughter emoji.

Also Reno Omokri, one former special assistant to one former Nigerian president, Goodluck Jonathan also react. E say; “I sincerely hope those South Africans wey no consider Chidinma to be dia representative feel represented now.”